بقلم: سارة منوفلي
حكم ريدك
أعيش شانو
وحكم قدرك على قبلان
ومنى عليكي كم مرسال
يصل يلقاك في اطمئنان
ويغريك السلام موصول
مغلف بي شجن تحنان
وأضمك في خيال عيني
وأغطيك بي رموشي كمان
ولا كليت ولا مليت
أشيلك جوة في الوجدان
وكل زولٍ بعرفك شاف
ملامحك فيني
في صوتي
وفي عيني
وفي نمي وغنايا كمان
أنا المربوط قيودك ريد
ومسجونك ولا ندمان
وأنا المأسور
مجاهدك ليك
ودايرك أنت بس تكفي
أطولك وماني داير الحور
سكت حسي إذا سمعك
نغم نصي
ووقف خطوي إذا عندك
يدق باب المنام صحوي
ورجف حرفي
إذا عز الخيال بلقاك
كمل حبري
وصرخ حبي
إذا كل المعاي ساكتين
بتسمعي أنت يا صوتي
وتردي علي
بتهمسي أنت يا قصدي
وتعدي علي
تسوقيني وتوديني
على جرف الهوى المكتوب
و اتمتم دوب
وأشجي مسامع النايمين
صغار يادوب
على حبك نمت جواي
مدن حربك وساقتني
أظنك شان أنال منك
طريف النظرة كيفنك
وبيها سنين تصبرني
على بعدك
أدافر زحمتك جواي
وأعافر والصبر سلواي
وأمد حبك
إذا فاضت عيوني عليك
واسر حبك
وعشمان في الرضا منك
وأشرحلك عن المشروح
سفر بين السكات والبوح
حوار بين الجسد والروح
والفة مداها غير محدود
بين النيل وبلبل دوح
يشيلني من الأسى الساكن
عضامي وكل مفاصلي تنوح
أئن من وجعة الرغبة
وأرجع بالصبر رهبة
وحلم مسفوح
Leave a Reply