بقلم: خالد ضياء الدين
* ما هو ماممكن نفس الزول الهدم بلدك يدوه قروش الإعمار عشان يرجع يبنيها كمان هل يُعقل الزول الأكل قروش المطار الجديد 3 مرات تديه يعمر مطار الخرطوم؟ والبايع السكة حديد والموانئ ووزع أراضي البلد لعضويته على حساب الشعب، تديه تاني فرصة عشان يفسد مرة تالتة وخامسة وعاشرة؟
* ناس خلوها مستورة والشغالين بـفقه التحلل وده من الشيطان يا مولانا وشيل النص ورجع لينا الباقي وأنا حقي كم عشان أوقع ليك ديل، بعمروا بلد؟
* ياخ ما ممكن تشتغلوا مناشير في البلد طالعين ماكلين نازلين ماكلين حرام عليكم والله
* التعمير بتقوم بيه قيادة مؤمنة مخلصة وفية للشعب وبتخاف الله في نفسها وبلدها لكن تقول لي هم ذاتهم البعمروا؟ بقول ليك: كضاااب (بصوت عبدالرحيم محمد حسين)
* كمان ما في تعمير أثناء الحرب، لأنه ما في ضمان إنو التخريب ما يرجع يطال نفس العمرته ويهده من تاني وما في طريقة تحاسب ليك زول شايل بندقية بصفي في الناس شمال ويمين لذلك، ما في قروش تدخل خزينة البلد من مانحين عشان تمشي باسم التعمير والبلد وزير ماليتها حسب كلامه، استلم الوزارة عشان يضمن يطلع استحقاقات حركاتهم المسلحة وفق اتفاق جوبا يعني الزول ده عنده أولويات غير أولويات الشعب ولا كلامي ده ما في محله؟
* الإعمار عايز ناس يدينا نظيفة وألسنتها عفيفة وقلوبها صافية ناس جداد لنج يشتغلوا ليل ونهار وشرطاً يدينهم ما تكون اتلوثت بشبهة سرقة مال عام ولا شاركت في فتنة قتال ولا في يوم هتفت وطلبت بهدم بناية أو قصف كبري
* وعشان البلد دي تتعمر أول حاجة لازم الحرب تقيف ونفعل مبدأ الشفافية والأمانة تكون ألف أحمر والقوانين الرادعة لازم تدك حصون الفساد والمفسدين
* برضو عشان نعمر، لازم تكون في حكومة مدنية متوافق عليها ونظام ديمقراطي فيه من الشفافية وتسليط الضوء ما يمنع ويفضح خفافيش الظلام من جماعات الكومشن وسماسرة التوكيلات وشركات الباطن إنو يكون عندهم أي سلطة تمكنهم من وضع يدهم على أموال التعمير. لأنه ديل لو موجودين ما في بلد بتتعمر ولو ما انتهينا من عقلية كبار الموظفين المرتشين والسياسيين ضعاف النفوس بنكون زدناهم بدل ننقصهم
* 30 سنة فساد + فساد الحرب الأصبح الآن أكبر
* 30 سنة عذاب ونهب أموال العباد فيها ناس عملت مليارات وبنت قصور ومزارع وانغمست في ملذات الدنيا وهوى النفس الأمارة بالسوء ناس ركبت الفارهات وخزنت الدولارات تفتكروا ديل لو رجعوا السلطة بعمّروا بلد؟ ولا بينشفوا ريقها وريق الشعب؟
* هم لحدي الآن ما اعترفوا بفسادهم بل بدافعوا عنه ويبرروا. ديل بعمّروا ويبنو بلد؟
* عشان يتم الإعمار معناه لازم قيادات الدولة تكون نزيهة والحكومة لازم تكون مدنية نختها تحت الرقابة الشعبية عبر آليات متفق عليها مع قوانين صارمة ونافذة لمحاربة الفساد ولمن نقول حكومة مدنية قاصدين تكون في حرية البحث والسؤال عن عملتوا شنو، ووديتوا القروش وين؟ وورونا خططكم
* مدنية ما عسكرية لأنه الجيش مفترض ينشغل بتعمير نفسه وهو طالع من حرب مرهقة فلازم نخليه يركز في شغله والمدنيين يركزوا في شغلهم، الحكومة توفّر للجيش حصة معتبرة من موارد الدولة عشان يعيد بناء المؤسسة وفق نظام مهني بعيد عن أي تدخل سياسي لأي حزب، وزي ما ميزانية التعليم والصحة مسؤولية وزاراتهم الجيش عبر وزارة الدفاع مع قيادته معنيين بتطوير مؤسستهم. بلاش ينشغل بحاجات تانية ما من صميم مهامه.
* عدالة الإعمار لازم تعم كل البلد ولازم في الأول ننهي مظاهر التسليح خارج إطار الجيش لأن وجود المليشيات هو أكبر مهدد للإعمار وللجيش نفسه والحالة الماثلة خير دليل، كمان واجب علينا نحدد فترة زمنية للإعمار، القصة ما سايبة ساكت فالإعمار يا سادة ما معناه نرجع نبني العمارة الاتهدّت والكبري الاتقصف، الإعمار مفترض يضع خارطة للوطن كل الوطن ونحدد الأولويات ونخطط لعدالة التوزيع عشان نمنع أي حرب تانية ونقطع لسان المزايدين.
* جزء من إعادة التعمير تحقيق العدالة البتخلي الجميع يشوف نفسه في مراية الوطن بياناً بالعمل مش بطريقة الماعجبو الدوشكا تتكلم
* البلد ما بتتعمر إذا التخريب مستمر والفساد موجود ناس هد الكبري بنبنيه وأضرب قاعة الصداقة عشان فيها قناص وأحرق عمارة الفلول عليكم الله اختونا خلو البلد تنجم
* بالمختصر المفيد ما في تعمير وإعمار إذا ما الناس قعدت وصفت النية، ووضعت مصلحة البلد قدامها
* كمان ثورة ديسمبر لازم شعاراتها تكون حاضرة ومصلحة الفقراء أولوية والمال البجينا من الخارج تحت اسم تعمير ما هدمته الحرب لازم نتأكد إنو ما خصمًا على قرارنا السياسي ومصلحتنا الوطنية واستراتيجية أهدافنا، يعني شنو نعيد بناء شارع زلط مقابل التفريط في سيادة بلد؟
* أي زول، حزب، مليشيا، جيش، عايز يعمّر خليه يوقف هدم وأهم حاجة في تعمير البلد إننا نحافظ على شبابه من الموت المجاني ونمنع خطاب الكراهية وننهي وجود المليشيات لانه(ما في مليشيا بتعمّر دولة).