رصد الحراك الثوري (الجمعة 1/مارس)

رصد الحراك الثوري (الجمعة 1/مارس)

تقرير : مهادن الزعيم

✵ عدنا بعد غياب يومين عن الرصد لظروف خاصة ومازالت الثورة مشتعلة ومستمرة وكل يوم بتكسب ناس جداد وارض جديدة ….
✵ الليلة الجمعة مطلع مارس (مارس حارس ليس يخون) والدوام كالعادة ببدا بعد صلاة الجمعة والناس بتطلع من المساجد علي الشوارع طوالي …….
✵ طبعا يوم الليلة اهميتو جاية من انو اول يوم بعد تطبيق احكام الطواري في 8 ثوار يوم امس استجابة لدعوة الكوز اسحق فضل الله بتطبيق اقصي الاحكام لقتل الثورة …..
✵ كالعادة الشعب السوداني مابخاف من قانون طواري ولابتهموا احكام ذي عشان كدا طلعت مظاهرات فب اربعة ولايات بعد صلاة الجمعة وهي (الخرطوم الجزيرة الشمالية وكسلا) …………
✵ ضربة البداية جات من #ودنوباوي عندما خرج المتظاهرون عقب الصلاة من مسجد السيد عبدالرحمن وهتفوا باسقاط النظام وقفلوا الشوارع وتعرضو للقمع كالعادة واصيب طفل دون العاشرة في رأسه بقزيفة بمبان لكن الحمد لله حالتو مستقرة ………..
✵ ناس #بيت_المال دائما بشكلوا ثنائية مع ودنوباوي والليلة طلعوا برضو بتنظيم جميل (ناس تهتف وناس ترصد وناس تترس) وهتفوا باسقاط النظام …..
✵ الكلاكلة #الوحدة خرجوا في حشود مهيبة بعد الصلاة وهتفوا باسقاط النظام وعندما اصبح الحشد ضخما تحركوا الي شارع ابوعواض واغلقوه ….
✵ ناس #اللاماب ناصر كانو اكثر تنظميا وحشودا في مظاهرتهم نهار اليوم وهتفوا باسقاط النظام ….
✵ ناس #الخرطوم3 حرقوا لستك في نص الزلط وهتفوا (حكومة الكوز تسقط بس) ….
✵ #سوبا الحلة والحضور الدائم والثابت في كل جمعة خرجوا اليوم ايضا ليقولو (لا لقانون الطواري لا لبقاء النظام)
✵ حي #جبرة والموكب الثابت في كل يوم ليل نهار خرجو نهار اليوم ايضا ايضا رغما عن قوانين الطوارئ وهتفوا باسقاط النظام …………..
✵ ناس #الديم ولعوا لساتك من الصباح في تقاطعات الزلط والرباطة لمن جو لقوا الشارع فاضي وكررو الحركة دي كم مرة وبعد الصلاة انتهت كتموها في تقاطع ابوفارس والعصر دوروها تاني في سوق الديم ….
✵ من الولاية الشمالية خرج جماهير #كرمة البلد في مظاهرة كبيرة وهتفوا (عاملين كيزان تسقط بس … كيزان علي مين .. كيزان سارقين تسقط بس) ….
✵ من ولاية الجزيرة خرجت مظاهرات كبيرة من مدينة #العزازي محلية القرشي هتف فيها المتظاهرون باسقاط النظام ……….
✵ في ذات الولاية خرج شباب قرية #ابوسير الحلاويين عصر اليوم ورفعوا لافتات تطالب باسقاط النظام وقفلوا شارع ودحبوبة باللساتك المشتعلة. ……
✵ بعد صلاة العصر خرج مواطني قرية #الهبيكة عكود ريفي رفاعة بولاية الجزيرة واغلقوا شارع الشرق وهتفوا باسقاط النظام وتم اعتقال 4 متظاهرين …..
✵ من ولاية كسلا خرجت جماهير مدينة #خشم_القربة بعد صلاة الجمعة ورفعوا صورة ابن المنطقة الشهيد احمد الخير وطالبوا بالقصاص له ولكل والشهداء كما طالبوا باسقاط النظام
✵ملحق صور وفيديوهات لكل المظاهرات الانطلقت نهار اليوم وسوف نقوم برصد المظاهرات الليلية في تقرير منفصل بعد منتصف الليل ….

#الثورة_مستمرة
#تسقط_بس