إيجابيات وسلبيات موكب 24 مارس

•  من الإيجابيات يمكننا القول ان امدرمان رجعت لعهد الحشود الكبيرة ذي ماكان في ديسمبر (حرفيا دا من أضخم المواكب الطلعت في امدرمان خلال شهري فبراير ومارس) .

•  في امدرمان الليلة رجعت للمواكب هيبتها وشعبيتها (الآباء والأمهات واقفين قدام البيوت على طول شارع الموردة ورافعين علامات النصر والزغاريد والدعوات ماتديك الدرب) .

1.  هيبة الموكب ظهرت لحظة ظهوره للقوات الأمنية، حرفيا هم بعاينوا مد البصر في شارع الموردة وماشايفين نهاية الحشد عشان كدا ما اخدوا معانا 10 دقايق في كسر ترس السلك الشائك العاملنو والوصول لوجهة الموكب وهي مبني البرلمان .

•  الهتافات الليلة رجعت ذي زمان وبقوة كبيرة شديد وحماس عالي وشئ من الغضب (ممكن عادي تسمع صوت الهتافات وتقيف ربع ساعة حتى الموكب يظهر ليك) .

•  الأسر على طول شارع الشهيد عبد العظيم (الأربعين سابقا) خاتين كراسي قدام البيوت وبتونسوا في امغان الله لحدي قريب المغرب والحركة دي قامت بحماية ضهرنا وبسبب التواجد دا ماقدرت القوات الأمنية تعمل فينا صندوق .

•  موكب الخرطوم يحسب له الانضباط في زمن الانطلاق (الواحدة ظهرا) ويحسب له ايضا نجاحه الكبير في كسر الطوق الأمني واقتحام شارع القصر كما أن حشده كان كبير جدا والحمد لله .

•  السلبيات ياها السلبيات المن زمان بتحصل في امدرمان وهي الموكب بتجمع متاخر شديد (اتحركنا الساعة 3) بسبب بعد نقاط التجمع عن نقطة الانطلاق والقيادة الميدانية ماكانت خاتة احتمال نوصل البرلمان بدري عشان كدا في ناس كتيرة انسحبت من الساعة أربعة وبقولوا (البرلمان ووصلناهو تاني البرنامج شنو؟) .

•  مقدمة الموكب كانت بتتحرك بسرعة شديدة ودا شرا الموكب وخلاهو كأنو مجموعة مواكب أو كتل متحركة مع بعض بفراغات قصيرة ودا بضر في الإعلام والتوثيق لأنو مابظهر الحشد كامل .

•  الرحمة والمغفرة للشهيد محمد عبداللطيف الذي استشهد خلال موكب اليوم بمدني وعاجل الشفاء للجرحى والمصابين.

مكملين بإذن الله والثورة مستمرة ….

سلام ومحبة